SUN世代：百萬富Miss 教姊妹發達

世上沒有不勞而獲，二十幾歲就躋身百萬富翁行列的張佩儀（Denise），深信致富需要計劃，她手握一大疊搵錢秘笈，但沒有鎖入夾萬，更出書公諸同好。這位「致富Miss」就是愛分享，多年來落力教女性理財，不是鼓吹女權主義，只是鼓勵姊妹要致富自強。

想做百萬富女，除了嫁入豪門另有辦法？「單靠儲錢唔知儲幾多年先得，所以要妥善理財，透過投資錢搵錢！」Denise滿口致富秘笈。現實中她是無家底的公屋妹，靠做兼職及借政府貸款完成大學，畢業後曾做過艱辛的工作：「做咗三年買手，但好辛苦，要飛去內地、日本，每日返十幾個鐘，人工係高但無晒自己嘅生活！」

過度忙碌，令生活漸受蠶食。九六年她毅然將一切推倒重來，「我唔想一世係咁，所以轉做理財顧問，職位低，月薪跌到萬零蚊！我打幾百個Cold Call搵客，當係興趣咁打就唔覺慘，最終有四十個成為客戶，好開心！」

「一出糧就搵嘢買」

後來，Denise先後任職證券行及理財顧問公司，她不諱言女性要在財經界有成就並不容易：「我有少少投資天分，但點夠男仔叻？我要花上更多時間去學，乜投資方式都去鑽研，窩輪係難，咪學多幾次囉。我都鍾意投資，一出糧就搵嘢買，好過擺銀行蝕畀通脹，『錢搵錢』令我二十幾歲就有一百萬！」

Denise成功令錢為自己工作，身家不斷倍升，在職場上也持續增值，職位逐級而上，現為美國萬利理財總裁。她重視對客人的承諾及溝通，無論市場如何風雲變色，也時刻保持快樂。不過，「快樂」背後仍埋藏不少辛酸。

「女仔要記錄支出」

她說：「呢行壓力好大，幫客人賺到錢，未必會多謝，但蝕錢就會鬧，仲試過有客打去雜誌投訴，但我無做錯事，為件事喊咗一日！」幸而「投訴風雲」獲平反，證實客人投資損手只是不聽她勸告。雖然平反聲明只有「郵票」大小，但已足夠釋懷：「我係天秤座，重視公平！」

十多年來，她化身教師把財金知識深入淺出教導客人。雖不是心理學家，但她理解男女理財特性，今年六月就出版教女性做「百萬富女」的書籍：「女性保守、有耐性，好適合投資，但唔敢踏出第一步，甚至唔知啲錢使咗喺邊！我建議女仔記錄支出，減少不必要開支，試買賺錢慢但穩陣嘅外幣同基金！」翻閱其著作首頁，就列明「本書作者收益將全數捐作慈善用途」，原來她將心血造福兒童：「好想幫內地山區中學生，令佢哋可用知識脫貧！」

來源：太陽日報　2011年7月11日