購物車內無任何商品
欄目叫「品味蘋果」，訪問葉維晉，着實顛覆。「講紅酒就話，講偉哥，男人好抗拒。」他笑笑口。做了「男士救星」30年，人稱「泌尿科聖手」，他閱男無數，深知一講性功能障礙，由中環西裝友到地盤老粗，雞飛狗走。「男人都係好強。」位至副行政總監，由合併肝臟移植中心，到設定外科手術評分制度，全是燙手山芋。
這個醫管局強人，上年告別做了30年的廣華醫院，第一時間寫下《男人最強》，總結最強男人之苦。「要做最強，其實幾辛苦。」袁國勇？「佢叻到冇朋友」；高永文？「讀書時已係領袖」。昔日港大醫學院三劍俠，今日各有發展。香蕉成熟之後，55歲的葉維晉，退一步，以柔制剛，是為強中之強。
記者：呂麗嬋攝影︰羅君豪、李家皓
告別做了30年的廣華醫院，在中環私人執業的葉維晉，除了一身西裝筆挺了，生活無大改變。採訪當天，坐在診症室候診的，是由廣華追隨到底的忠心病人；幫忙打點的，是結婚29年的初戀情人太太。一家六口全家福，放在正中央；周遊列國買下的玉雕陽具擺設，放滿一櫃，他會逐件向記者介紹出處，像個興致勃勃的頑童。
大半世人，只打過一份工；認識的第一個女朋友，拍拖兩年結婚，結婚兩年做爸爸，「喺QE（伊利沙伯醫院）實習時，個社工覺得我好仔，成日同病人傾偈，話要介紹個女仔我識，一拍拖就做埋老婆。」今日的葉維晉，架着金絲眼鏡「肥頭耷耳」，當年卻是醫學界陳豪級數的「筍盤」。物移星換，大女今年27歲，細仔都行年13。
55歲的人生，風平浪靜。他選修的泌尿專科，卻「越走越偏」，他是本港首批專治男性陽痿的西醫。男士救星、不舉聖手，一個個充滿「江湖味」的寶號，不脛而走。「可能因為我鍾意講嘢，又唔怕醜啩。」感情生活美滿，小小診症室，讓他遇上的，卻盡是情感交戰：自覺「小弟弟」不如人的憂鬱少男、年輕太太走佬自我價值崩潰的後中年，人人一殼眼淚。
「最初冇話專治陽痿，20年前，有事只會搵偏方醫，好少正視。」公立醫院門診人人做到爆廠，出名「長氣」的他，卻花時間同病人「談心」，「好多年前，有次同個男病人傾偈，佢60幾歲，因為排尿唔暢順嚟睇，講講吓突然喊晒，話發現太太登報搵男伴，好傷心。」由排尿講到食住家飯，又由食住家飯講到太太徵婚、忘年戀危危乎，一傾大半小時。換上今日，外面打蛇餅的病人，怕且投訴去了，當年卻引為佳話，覺得這個長氣醫生不太冷。
「嗰個年代，若有男病人去睇西醫，話自己性功能不濟，醫生一般唔會點理，因為『唔得』唔會立即死人。」葉維晉扮了個鬼臉。九十年代初，專治不舉的新藥物和打針療法開始出現，當年的「偉哥」，不再是一個人，而是一粒報稱「效力宏大」的藍色藥丸，有些人奉為「起死回生」的靈丹妙藥、有些人訕笑佯裝不屑一顧。歸根究柢，只因沒有勇氣正視問題。
「香港好兩極，好開放又好保守，做性功能障礙病人研究，要招募接受治療嘅病人收集數據，比如亞洲區，每個國家或地區要選一百人追蹤研究，但試過好多次，都係香港人跑第尾，湊唔夠數。」香港最多鍵盤戰士，藏在鍵盤後面，談情說性口若懸河，要「拋頭露面」，卻是另一回事。「性問題，好多人仍然會收收埋埋，搞到好多誤解，啼笑皆非。」
遇到的故事千奇百怪，有小男生誤信網聞，以為「一生人只可做三千次」；也有患上更衣室症候群的自卑男，勞煩他要一臉認真解釋居高臨下「觀鳥」，與水平線直望可能出現的視差，以釋疑慮！96年，時任廣華醫院外科部門主管的他，力促成立首間男士健康診所；在醫療講座上又以青瓜及香蕉，妙喻男士性功能，成為一時話題。
「你走得咁前，唔怕俾人笑係黃綠醫生咩？」記者不禁問，葉維晉聞言大笑：「所以話男人都係好強，越艱難，越要做。有啲嘢，個個做冇意思；有需要但個個唔做，又會好大件事。」仍是一貫謙遜溫文，卻自有股「我不入地獄誰入」的霸氣！
事實上，去年離開醫管局時，位至副行政總監，將原有的兩個肝臟移植登記名冊合而為一，到03年推行手術同意書計劃，設立外科手術評分制度，將外科訓練納入正軌，全是吃力不討好的燙手山芋。「兩樣嘢，都係高永文叫我幫手。合併名冊壓力最大，嗰時佢（高永文）仲喺醫管局，打嚟叫我幫手，話你抵得諗接咗去啦，兩邊（中大及港大）你都有啲偈傾，統一輪候冊，資源集中啲，對病人肯定有好處」。
高永文是葉維晉醫學院的同班同學，思前想後，他決定背起千斤擔，救火去。「大家未坐低開會，我先逐個教授拜訪，了解佢哋嘅感受同諗法。」統一輪候冊涉權力、資源再分配，權充溝通橋樑，難免如履薄冰，「兩邊教授都係認識多年嘅朋友，但我嘅宗旨係解決件事，只要態度誠懇，分歧幾大都好，我唔信冇得傾。」
教授們早上8點巡房，家住九龍塘的他，晨早變身小記者，7點就去等，「一般都可以傾半個鐘，有時唔得閒，午飯時間再傾。人哋見你咁有誠意，都唔好意思推。」不少是昔日校友同門，換轉別人，大家「咁高咁大」，何需屈就？論資歷絕不遜教授級的葉維晉，當年卻以委員會主席身份，禮賢下士，遊走兩間龍頭醫院，主動四出叩門摸底。一場大風波，最終奇蹟軟着陸，在中大及港大分別都有教職的葉維晉，功不可沒。
自此，在男士救星以外，他又多了一個「醫學界談判專家」的外號！「每個人都有佢嘅強項，我嘅強項係同人溝通！」無怪這些年，他試過破天荒開班授徒教醫生與病人相處之道；外科部門試過有醫生聯署集體倒主管，他又空降署理職位排難解紛，儼如魯仲連！「由細到大，我都係做呢類角色，醫學院班舊同學見面話當年，都話三歲定八十」。不顯眼卻務實可靠，「筍盤」，豈是浪得虛名。
事實上，他的大學死黨個個猛人，除了高永文，還包括港大微生物學系講座教授袁國勇。「袁國勇讀書時已似十足科學家，唔使讀書成績一樣好。我最記得，嗰時教授好惡，問書唔識會趕人走，我哋全部推佢出去答，唔單止冇俾教授鬧，仲讚我哋：?家啲新人原來幾好，我哋個個喺隔籬偷笑。」76年齊齊入港大，相識37載，識於微時，昔日三劍俠，今日仔大女大，仍不時見面。
「我同袁國勇大家嗰姓氏都係『Y』字頭，所以讀醫五年，基本上都同組，做乜都拍住上。好處係有佢特別心安，唔好處係因為佢太叻，一直喺佢陰影下長大。」說起流金歲月，他大笑起來。因着袁國勇，他又與高永文熟稔，「佢哋係皇仁仔，喺中學已好熟，高永文當年係班代表，由文娛活動到學術活動，都由佢一手包辦；啲同學對分組做功課安排有咩意見，就推佢出頭」。
當年，考入醫學院的都是尖子，喇沙畢業的葉維晉，中學年年考第一，直言考入大學之後，才明白天外有天，「每個人都有唔同角色，我肯定唔係最聰明嗰個，但勝在抵得諗，交project，一班同學去華富邨做民調，分工合作搜集咗大堆資料，到最後一定由我寫報告、做歸納。」這種抵得諗精神，現在近乎失傳。由醫學院到醫管局，讓他忙得不可開交，卻也為他贏盡讚譽。
臨離開醫管局，他為廣華醫院十億重建大計掌舵，繼續發揮魯仲連特質，「擴建，一定要落區諮詢區議會，由去到被人指住嚟鬧，到落實通過十年重建計劃，我覺得真係要退落嚟休息吓。雖然有人話，你醫好一個人就只有一個人好；你做好個行政架構，就有好多人可以受惠……但我覺得，係時候做啲自己鍾意嘅嘢」。55歲，抵得諗的葉維晉，終於想到自己。
重回診症室面向病人，他在醫管局教前線醫生的「十大令病人感安慰的說話」，終於可以「學以致用」，這些，都是久違了的快樂。「喺公立醫院30年，見盡千奇百怪嘅個案，一早想出本書，只係冇時間寫。」遇過寧願賭命食壯陽藥也不願求診的失婚男；也遇過突然「唔得」的猛男，只因患有心臟病卻不自知。說着說着，有病人來了，他一叠聲道歉，又衝出去看症，留下記者與前來探班的太太閒話家常。
「?家時間自由啲，起碼可以準時返屋企食飯。」當年的醫學界陳豪，肥了、頭髮稀疏了，老早走了樣，但望着丈夫背影的葉太，仍一面崇拜。以柔制剛，可以好強，信不信由你。
